വികർണ്ണൻ
ചെറു വിവരണം: നൂറു സഹോദരന്മാരുടെ നിഴലിൽ ജനിച്ചവനും, എന്നാൽ ധർമ്മത്തിന്റ വെളിച്ചത്തിൽ മാത്രം നടന്നവനുമാണ് വികർണ്ണൻ. സ്വന്തം ചോരയെ ധിക്കരിച്ചുകൊണ്ട് അയാൾ സഭയിൽ സത്യം വിളിച്ചുപറഞ്ഞു. വികർണ്ണൻ – നിശ്ശബ്ദനായ അനുജൻ, എന്നാൽ ധർമ്മത്തിൻ്റെ അവസാനത്തെ വാൾ.
കർമ്മത്തിൻ്റെ കല്ലെറിഞ്ഞ നിമിഷം
ഹസ്തിനപുരിയിലെ രാജകൊട്ടാരം. പുത്രകാമേഷ്ടി യാഗത്തിനുശേഷം ഗാന്ധാരിക്ക് ജനിച്ച നൂറു പുത്രന്മാരിൽ ഒരാളായിരുന്നു വികർണ്ണൻ. ദുര്യോധനന്റെ അധികാരക്കൊതിയുടെയും ദുശ്ശാസനന്റെ ദ ർവാശിയുടെയും ഇടയിൽ, അവൻ എന്നും ഒരു നിഴൽ മാത്രമായിരുന്നു. വികർണ്ണൻ എന്നാൽ "വിശിഷ്ടമായ കർണ്ണമുള്ളവൻ" – അതായത്, ശരിയായതിനെ മാത്രം ശ്രദ്ധിക്കുന്നവൻ.
കൗരവനായി ജനിച്ച പാണ്ഡവൻ
വികർണ്ണന്റെ ജനനം തന്നെ അസാധാരണമായിരുന്നു. ദുര്യോധനൻ ജനിച്ചപ്പോൾ കേട്ട കുറുക്കന്റെ ഓരിയിടൽ ദുശ്ശകുനമായിരുന്നെങ്കിൽ, വികർണ്ണൻ ജനിച്ചപ്പോൾ കൊട്ടാരത്തിൽ ഒരു തണുത്ത കാറ്റ് വീശി. യാഗശാലയിലെ ഹോമകുണ്ഡം ഒരു നിമിഷം നീലവെളിച്ചം നൽകിയെന്ന് മഹാഭാരതത്തിൽ പറയുന്നു .അധികാരത്തിനും അഹങ്കാരത്തിനും മധ്യേ, ധർമ്മത്തിന്റെ നേരിയ ഒരു കണികയായി വികർണ്ണൻ വളർന്നു.
കൗരവരോടാണ് രക്തബന്ധമെങ്കിലും, പാണ്ഡവരുമായിട്ടായിരുന്നു വികർണ്ണന് ഏറേ അടുപ്പം. ഭീമന്റെ ബാഹുബലവും , അർജ്ജുനന്റെ ഏകാഗ്രതയും , യുധിഷ്ഠിരന്റെ ധർമ്മബോധവും അവൻ ബഹുമാനിച്ചു. പലപ്പോഴും ദുര്യോധനന്റെ ദുഷ്പ്രവർത്തികളിൽ നിന്നും വികർണ്ണൻ ഒഴിഞ്ഞുമാറി. പാണ്ഡവരെ വധിക്കാനുള്ള പുരം നിർമ്മിച്ചപ്പോൾ, അതിന്റെ ഭവിഷ്യത്തുകളെക്കുറിച്ച് ദുര്യോധനന് മുന്നറിയിപ്പ് നൽകാൻ ശ്രമിച്ച ഏക കൗരവനും വികർണ്ണനായിരുന്നു.
വികർണ്ണൻ വിവാഹം ചെയ്തത് ഉജ്ജയിനിയിലെ ഒരു സാധാരണ നാട്ടുരാജാവിന്റെ മകളായ മാളവികയെആയിരുന്നു. അധികാരത്തിന്റെയോ സമ്പത്തിന്റെയോ പുറകിൽ പോകാതെ, വികർണ്ണൻ തിരഞ്ഞെടുത്തത് സത്യസന്ധതയെയും ലാളിത്യത്തെയും സ്നേഹിക്കുന്ന ഒരു പെൺകുട്ടിയെ ആയിരുന്നു. മാളവികയുടെ സാന്നിധ്യം വികർണ്ണന്റെ ധാർമ്മിക നിലപാടുകൾക്ക് ഒരു തണലായി വർത്തിച്ചു. ദുര്യോധനന്റെ സഭയിലെ പ്രവർത്തികൾ കാണുമ്പോൾ അവൾ നിശ്ശബ്ദം കണ്ണീർ പൊഴിച്ചു, വികർണ്ണന്റെ മനസ്സിലെ നീറ്റൽ അവൾ പങ്കുവെച്ചു.
"നിങ്ങൾ സത്യം പറയണം, പ്രഭോ. നിങ്ങൾ രാജകീയ രക്തത്തിൽ പിറന്നവനാണ്. സത്യത്തിനുവേണ്ടി നിലകൊള്ളുക എന്നതാണ് ഒരു രാജകുമാരന്റെ ധർമ്മം," അവൾ പലപ്പോഴും അവനോട് മന്ത്രിച്ചു. ആ വാക്കുകൾ വികർണ്ണന്റെ ധൈര്യത്തിന് ഇന്ധനമായി.
വികർണ്ണനെ ഇതിഹാസത്തിൽ അനശ്വരനാക്കിയത് ആ ഒറ്റ നിമിഷമാണ് – ചൂതുകളിയിലെ ദ്രൗപദീ വസ്ത്രാക്ഷേപം. ദുര്യോധനന്റെ ക്രൂരമായ ആജ്ഞ കേട്ട് ദുശ്ശാസനൻ പാഞ്ചാലിയെ , രാജ്യത്തിന്റെ മഹാറാണിയെ, തലമുടിക്ക് പിടിച്ച് വലിച്ചിഴച്ചു. ഭയത്താൽ അവളുടെ കണ്ണുകൾ വിടർന്നു, വസ്ത്രങ്ങൾ അലങ്കോലപ്പെട്ടു. രക്തത്തിൽ കുളിച്ച സിംഹി കണക്കെ അവൾ സഭയിൽ പ്രവേശിക്കുമ്പോൾ, അവിടെയുണ്ടായിരുന്ന ധർമ്മജ്ഞരെല്ലാം തലകുനിച്ചു, ഭീഷ്മരും ദ്രോണരും പോലും ആ അനീതിക്കെതിരെ ഒരു വാക്കുപോലും ഉരുവിടുകയുണ്ടായില്ല . അങ്ങനെ ചെയുവാൻ പാടില്ല കുമാരാ, ഇത് അധർമമാണ്. കൗരവരാജധാനിയിൽ ഇങ്ങനെസ്ത്രീകളെ അപമാനിച്ചിട്ടില്ല. എന്ന്പറയുവാൻ പോലും ധർമജ്ഞർ എന്ന് സ്വയം വിശേഷിപ്പിക്കുന്ന ഭീഷ്മരോ. ദ്രോണരോ, കൃപരോറോ എന്തിനേറെ വിദുരാരോ പോലും ആ ആനീതിയെ എതിർത്തില്ല. ദുര്യോധനനും, കർണ്ണനും , മറ്റുള്ള കൗരവരും ആർത്തുചിരിച്ചു.
നൂറ് കൗരവരുടെ ഇടയിൽ ഒരുവൻ മാത്രം ഈ ദാരുണ കാഴ്ച കണ്ട് വിറച്ചുപോയി. അയാളുടെ കണ്ണുകൾ നിറഞ്ഞു, ഹൃദയം നുറുങ്ങി. അയാൾ പാണ്ഡവരോട് മമത കാണിച്ചതുകൊണ്ടല്ല, ധർമ്മം ലംഘിക്കപ്പെടുന്നത് കണ്ടതുകൊണ്ടാണ് വേദനിച്ചത്. വികർണ്ണൻ അവന്റെ ഇരിപ്പിടത്തിൽ നിന്ന് ചാടിയെഴുന്നേറ്റു.
ദ്രൗപതിയുടെ നേർക്ക് തിരിഞ്ഞ്, അവൻ ദുഃഖത്തോടെ കൈകൂപ്പി: " ദേവീ, അങ്ങയുടെ ഈ ദുരവസ്ഥ കണ്ടിട്ടും സഭ നിശ്ശബ്ദമായിരിക്കുന്നത് കൗരവ കുലത്തിന് ശാപമാണ്.ക്ഷമിക്കണം! രാജകീയമായ ഈ സഭയിൽ, ഞാനൊരു കൗരവൻ മാത്രമാണ്. എങ്കിലും ഞാൻ സത്യം വിളിച്ചുപറയും."
കണ്ണുകൾ രക്തവർണ്ണമായി, വികർണ്ണന്റെ വാക്കുകൾ കത്തിജ്വലിച്ചു: "ഈ ചൂത് കളി തന്നേ അനീതിയാണ്! ധർമ്മത്തെ ചതിച്ചുകൊണ്ട് നേടിയതാണ്! സ്വയം അടിമയായ ഒരാൾക്ക് എങ്ങനെ മറ്റൊരാളെ പണയം വെക്കാൻ കഴിയും? ദ്രൗപദിക്ക് അഞ്ച് ഭർത്താക്കന്മാരുണ്ട്! ഒറ്റ ഭർത്താവിന്റെ തീരുമാനത്തിന് അവൾ അടിമയല്ല! ഈ പ്രവൃത്തി, നമ്മുടെ കുലത്തെയും, രാജവംശത്തെയും, ധർമ്മത്തെയും അപമാനിക്കുന്നതിന് തുല്യമാണ്! നിങ്ങൾ ഈ നിമിഷം ഇത് അവസാനിപ്പിക്കണം!"
ദുര്യോധനൻ കോപം കൊണ്ട് വിറച്ചു: "വികർണ്ണാ, നീ ഞങ്ങളുടെ അനുജനോ അതോ ശത്രുവോ? ഇവിടെ കൗരവ പക്ഷത്താണ് നീ ഇരിക്കുന്നത്, ധർമ്മത്തെക്കുറിച്ച് ഉപദേശിക്കാൻ നിനക്ക് അവകാശമില്ല!"
കർണ്ണൻ പരിഹസിച്ചു, അവൻ്റെ ചിരിയിൽ വിഷം കലർന്നിരുന്നു: "അനുജാ, നിനക്ക് ധർമ്മത്തെക്കുറിച്ചുള്ള അറിവ് കുറവാണ്! അഞ്ചുപേരുടെ ഒപ്പം ശയിക്കുന്ന ഈ സ്ത്രീക്ക് വേണ്ടി നീ കുടുംബത്തെ ധിക്കരിക്കുന്നു! ദാസികൾക്കുപോലും ഇതിലും ആഭിജാത്യം ഉണ്ട് .ഇത്ര ചെറിയ കാര്യത്തിന് വേണ്ടി നീ കുടുംബബന്ധം തകർക്കരുത്!"
വികർണ്ണൻ ഭയപ്പെട്ടില്ല. അവൻ തലയുയർത്തി നിന്നു, അയാളുടെ കണ്ണുകളിൽ അഗ്നിയുണ്ടായിരുന്നു. "ഞാൻ എന്നും ധർമ്മത്തിൻ്റെ പക്ഷത്താണ്! നിങ്ങൾ കാണിക്കുന്നത് അനീതിയാണ്, എന്റെ സഹോദരാ. നിങ്ങൾ നാശത്തിലേക്ക് നയിക്കുകയാണ് , ഒപ്പം ഈ രാജവംശത്തെയും നശിപ്പിക്കുകയാണ്!"
വികർണൻ (വേദനയോടെ): നിയമം മനുഷ്യനെയല്ല, ധർമ്മത്തെയായിരിക്കണം രക്ഷിക്കേണ്ടത്!
ദുര്യോധനൻ (കോപത്തോടെ):വികർണാ! നീ എന്റെ സഹോദരനല്ല!
നീ പാണ്ഡവരുടെ വാദം പറയുന്നവനാണ്!
വികർണൻ: ഞാൻ പാണ്ഡവരുടെ വാദം പറയുന്നവനല്ല...
ഞാൻ മനുഷ്യന്റെ വാദം പറയുന്നവനാണ്!
ആ നിമിഷം, കൗരവസഭയിൽ ഒരു കൗരവൻ ധർമ്മത്തിന്റെ മൂന്നാം കണ്ണായി നിന്നു. ദ്രൗപദിയുടെ മാനത്തിന് വേണ്ടി നിലകൊണ്ട ആ ഏകശബ്ദം, വരാനിരിക്കുന്ന യുദ്ധത്തിൻ്റെ മുന്നറിയിപ്പായിരുന്നു. അതായിരുന്നു ആ സഭയിലെ ഏക സത്യസാക്ഷ്യം.
കുരുക്ഷേത്ര യുദ്ധം ആരംഭിച്ചപ്പോൾ, വികർണ്ണന്റെ . മനസ്സ് തീവ്രമായ സംഘർഷത്തിലായിരുന്നു. താൻ അനീതിയുടെ പക്ഷത്താണെന്ന് അവനറിയാമായിരുന്നു, ഇത് കുരു രാജവംശത്തിന്റെ യുദ്ധം ആണ് രാജകീയമായ കൂറ് അവനെ ബന്ധിച്ചു. ദുര്യോധനനോടുള്ള സ്നേഹവും കടപ്പാടും അവനെ കൗരവരുടെ സൈന്യത്തിൽ ഉറപ്പിച്ചു നിർത്തി.
“ജേഷ്ടാ ദുര്യോധനാ, എന്റെ ധർമ്മം പാണ്ഡവരോടൊപ്പമാണ്. പക്ഷേ എന്റെ ശരീരം ജ്യേഷ്ഠൻ്റേതാണ്," എന്ന് പറഞ്ഞ് അവൻ യുദ്ധക്കളത്തിലിറങ്ങി.
യുദ്ധത്തിൻ്റെ പതിമൂന്നാം ദിവസം, വികർണ്ണൻ ഭീമനുമായി ഏറ്റുമുട്ടി.
ഭീമന്റെ ശബ്ദം യുദ്ധക്കളത്തിൽ മുഴങ്ങി: "ഓ വികർണ്ണാ! നീയാണ് കൗരവരിൽ സത്യസന്ധൻ. നിന്നെ കൊല്ലാൻ എൻ്റെ മനസ്സ് അനുവദിക്കുന്നില്ല, പക്ഷേ ഞാൻ ദ്രൗപദിക്കുവേണ്ടി എടുത്ത എന്റെ പ്രതിജ്ഞ എനിക്ക് പാലിക്കണം. നീ അനീതിയുടെ പക്ഷത്ത് നിന്നു!"
വികർണ്ണൻ പറഞ്ഞു: "ഭീമാ, എനിക്ക് ഈ യുദ്ധത്തിൽ മരിക്കുന്നതാണ് സന്തോഷം. ധർമ്മത്തെ ഉപേക്ഷിച്ചിട്ടും, ഈ ഭൂമിയിൽ ജീവിക്കാൻ എനിക്ക് ആഗ്രഹമില്ല."
ആ ഏറ്റുമുട്ടൽ ദുരന്തമായിരുന്നു. ഭീമൻ വികർണ്ണനെ വീഴ്ത്തി. നിലത്തുവീണ വികർണ്ണന്റെ തലയിലേക്ക് ഭീമൻ ഗദ ഉയർത്തിയപ്പോൾ, ഭീമൻന്റെ കണ്ണുകൾ നിറഞ്ഞു. ധർമ്മം പാലിച്ച ഒരാളെ ധർമ്മത്തിനുവേണ്ടി തന്നെ കൊല്ലേണ്ടിവന്ന ദുരന്തം!
വികർണ്ണൻ വീരചരമം പ്രാപിച്ചു. അയാളുടെ രക്തം വീണ മണ്ണ്, രാജകീയമായ കൂറിനും കുടുംബസ്നേഹത്തിനും അടിമപ്പെട്ട് ജീവൻ നഷ്ടപ്പെട്ട ധർമ്മിഷ്ഠന്റെ കഥ തലമുറകളോളം മന്ത്രിച്ചുകൊണ്ടേയിരുന്നു.
വികർണ്ണൻ: കൗരവനായി ജനിക്കുകയും, എന്നാൽ പാണ്ഡവനെപ്പോലെ ചിന്തിക്കുകയും ചെയ്തവൻ. ആധുനിക കാലത്തെ ധാർമ്മിക പ്രതിസന്ധിയുടെ പ്രതീകമാണ് വികർണ്ണൻ.
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ